Illum ninsabu eżatt xahrejn qabel il-festa tal-Madonna tal-Grazzja li din is-sena ser tiġi ċċelebrata l-Ħadd 15 ta’ Settembru, 2024.
L-Għaqda Madonna tal-Grazzja u l-Banda San Mikiel jinsabu ħerqana sabiex flimkien insarrfu frott xhur ta’ ħidma li għandhom joffru l-isbaħ u l-aqwa spettaklu matul il-jiem tal-festa tant għażiża għaż-Żabbarin.
Din is-sena ċ-ċelebrazzjonijiet bi preparazzjoni għall-festa ser jibdew bit-tnedija tal-festa nhar il-Ġimgħa 16 t’Awwissu fil-Verde Club Lounge fejn dakinhar ser jiġu mnedija b’mod uffiċjali ċ-ċelebrazzjonijiet tal-Għaqda tagħna kif ukoll marċi ġodda li ser inniedu għall-festa ta’ din is-sena.
Numru ta’ attivitajiet ser jiġu organizzati, uħud li issa jkunu mistennija minn sena għal oħra u oħrajn ġodda.
Il-marċ il-kbir ta’ San Mikiel ser jittella' bħal kull sena, marċ mistenni minn bosta Żabbarin u li din is-sena ser isir il-Ħadd 25 t’Awwissu, 2024.
Il-Ġimgħa tal-festa wkoll ser tkun imżewqa b’numru kbir ta’ avvenimenti u inizjattivi ġodda li ser jitħabbru dalwaqt.
Ma jonqosx li, frott il-ħidma tal-voluntiera, din is-sena ngawdu għadd ta’ proġetti ġodda li għandhom ikomplu jżewqu s-sbuħija tat-toroq u l-imsieraħ tagħna, kif ukoll il-marċi kbar li niċċelebraw b’mod uniku f’Ħaż-Żabbar.
Segwi din il-paġna sabiex taġġorna ruħek b’dak kollu li għandna imħejji għax-xhur u l-ġimgħat li ġejjin.
Komentar